ლევან დავითაშვილი: საქართველოს აკვაკულტურის განვითარების დიდი პოტენციალი აქვს
გარემოს დაცვისა და სოფლის მეურნეობის მინისტრი მიიჩნევს, რომ საქართველოს აკვაკულტურის დიდი შესაძლებლობა აქვს. ლევან დავითაშვილი განმარტავს, რომ ამ პოტენციალს ათვისება სჭირდება და ამ მიზნით სახელმწიფომ მნიშნელოვანი ნაბიჯები გადადგა.
„საქართველოს დიდი პოტენციალი აქვს როგორც აკვაკულტურის, ისე მარიკულტურის განვითარების თვალსაზრისით. პოტენციალს ათვისების მიზნით შემუშავდა კანონმდებლობა, რომელიც უკვე ძალაში შევიდა და რაც ხელს შეუწყობს ქვეყანაში აღნიშნული მიმართულების განვითარებას.
მინისტრმა წარმატების მაგალითად კომპანია "მარიკულტურა გეორგია" მოიყვანა, რომელმაც ამ მიმართულებით პირველი ნაბიჯები გადადგა.
"იმისათვის, რომ კიდევ მეტი იყოს ასეთი წარმატებული წარმოება, სახელმწიფოს მხარდაჭერა და ხელშეწყობა უნდა გაგრძელდეს. ისევე როგორც სოფლის მეურნეობის სხვა დარგებში, აკვაკულტურის და მარიკულტურის განვითარების მიმართულებით, ჩვენ გვექნება კომპლექსური მიდგომა, რაც მიწოდების ჯაჭვის ყველა რგოლის მხარდაჭერას ითვალისწინებს და გულისხმობს როგორც პირველადი, ასევე შემნახველი, გადამმუშავებელი წარმოების განვითარებას, ინფრასტრუქტურის შექმნას და, რა თქმა უნდა, ცოდნის გაზიარებას. სახელმწიფო აქტიურად გააგრძელებს კერძო ინიციატივების მხარდაჭერას, რადგან კერძო სექტორთან მჭიდრო თანამშრომლობით შევძლებთ საქართველოში როგორც აკვაკულტურის, ისე მარიკულტურის სწრაფ განვითარებას“, - აღნიშნა ლევან დავითაშვილმა.
2020 წელს, შავ ზღვაში, სოფელ კვარიათთან, ფუნქციონირება დაიწყო კომპანიის „მარიკულტურა გეორგია“ წყალქვეშა ზღვის ფერმამ, სადაც ზღვის პროდუქტების კულტივირება და მოყვანა ხორციელდება. ძირითადი აქცენტი კეთდება შავი ზღვის მიდიებზე და ხამანწკებზე. კომპანია პროდუქციის გატანას საექსპორტო ბაზრებზეც გეგმავს.
