სასტუმრო "ტელეგრაფი" პირველ სტუმარს 2024 წლის ბოლოს მიიღებს
თბილისში, ცენტრალური ფოსტის ყოფილ შენობაში 5-ვარსკვლავიანი სასტუმრო "ტელეგრაფი" პირველ სტუმარს 2024 წლის ბოლოსთვის მიიღებს. ამის შესახებ "ბიზნესპარტნიორთან" „სილქ როუდ რიალ ისთეითის“ აღმასრულებელმა დირექტორმა მამუკა შურღაიამ განაცხადა.
მისი ინფორმაციით, კომპანიამ მშენებლობა გასულ წელს დაიწყო და პროექტში 60 მილიონი ევროს ინვესტიციას ახორციელებს.
სასტუმრო „ტელეგრაფი“ „სილქ დეველოპმენტის“ პროექტია, სარეკონსტრუქციო სამუშაოებს კი საერთაშორისო სამშენებლო კომპანია DNT Construction-ი ახორციელებს.
სასტუმროში 8 სხვადასხვა კატეგორიის ნომრები მოეწყობა. სასტუმროში განსხვავებული კონცეფციის 7 რესტორანი და ჯაზ-კლუბი განთავსდება. ერთ-ერთ შიდა ეზოში პირველ სართულზე მოეწყობა ღია ბარი, ხოლო მეორე შიდა ეზოში მეორე სართულის დონეზე განთავსდება საბანკეტო-საკონფერენციო დარბაზი.
პროექტის მთავარ კომპონენტს – სასტუმროს მთავარი შესასვლელი რუსთაველის გამზირიდან ექნება. ლობი რესტორანთან და ბართან, მთავარ სამზარეულოსთან და შეხვედრების/საკონფერენციო/საბანკეტო დარბაზებთან ერთად პირველ სართულზე განთავსდება. მეორე სართული სტანდარტული ტიპის სასტუმრო ოთახებს და სპორტულ დარბაზს დაეთმობა. მესამე და მეოთხე სართულებზე კი სტანდარტული, ბიზნეს და უმაღლესი კლასის, ხოლო მე-5 სართულზე მხოლოდ ბიზნეს და უმაღლესი კლასის სასტუმრო ნომრები განთავსდება. შენობის ბოლო სართული საპრეზიდენტო სიუტს და პენტ ჰაუზს დაეთმობა.
შეგახსენებთ, „სილქ როუდ ჯგუფი“ ფოსტის ყოფილ შემობაში თავდაპირველად Park Inn-ის ბრენდის სასტუმროს გახსნას გეგმავდა. თუმცა მოგვიანებით ბრენდი შეიცვალა და ის Radisson Hotels Group-ის მმართველობაში იქნება.
