წელს GITA ინოვაციების ეკოსისტემის განვითარებისთვის ₾22 მლნ-ს დახარჯავს
ინოვაციებისა და ტექნოლოგიების სააგენტო ინოვაციების ეკოსისტემის განვითარებისთვის 2021 წელს 22 მილიონამდე ლარს დახარჯავს. მთლიანობაში სააგენტოს პროექტები 10 000-ზე მეტ ბენეფიციარს გააერთიანებს.
როგორც სააგენტოს თავმჯდომარემ 2020 წლის ანგარიშის წარდგენისას განაცხადა, აქტიურ ფაზაში შევიდა ტექნოლოგიების გადაცემის საპილოტე პროგრამა, რომელსაც ინოვაციების და ტექნოლოგიების სააგენტო ევროკავშირისა და მსოფლიო ბანკის მხარდაჭერით ახორციელებს.
პროგრამის ფარგლებში სააგენტო ქართულ სამეცნიერო ტექნოლოგიების ლიცენზირებაზე აქტიურად მუშაობს და მიმდინარეობს მოლაპარაკებები მსოფლიოში ცნობილ ინდუსტრიულ პარტნიორებთან, როგორიცაა: Airbus helicopters, Naval Group, Urgo და სხვები.
აღსანიშნავია, რომ 2020 წელს სამი ახალი ტექნოლოგიური პარკი ბათუმში, კასპსა და გურჯაანში, გაიხსნა.
2020 წელს ინოვაციების და ტექნოლოგიების სააგენტომ 3000 IT პროფესიონალის გადამზადების საპილოტე პროგრამაც დაიწყო, რომლის ფარგლებშიც კურსს საქართველოს 600-მდე მოქალაქე გადის.
ამავდროულად, მთავრობის გადაწყვეტილებით, IT კომპანიებს, რომლებიც უცხოეთში ყიდიან თავიანთ პროდუქტს, საშემოსავლო და მოგების გადასახადი 5%-მდე შეუმცირდათ, ხოლო ქონების და დღგ-ს გადასახადი განულდა. სწორედ ამ რეფორმის ფარგლებში 2020 წლის ოქტომბრიდან საქართველოში შემოვიდა ორი მსხვილი ამერიკული აიტი კომპანია ეპამი და ექსადელი, რომელთაც საქართველოს 100-მდე მოქალაქე დაასაქმეს.
