ოთარ ნადარაია: საქართველოდან IT მომსახურების ექსპორტი გაიზარდა, მიზეზი მიგრანტებია

საქართველოდან IT მომსახურების ექსპორტი იზრდება. TBC Capital-ის თანახმად, მიზეზი მიგრანტებია.

როგორც „ბიზნესპარტნიორს“ „თიბისი კაპიტალის“ მთავარმა ეკონომისტმა ოთარ ნადარაიამ  განუცხადა, საგადამხდელო ბალანსის პირველი კვარტლის მაჩვენებლებში, საინფორმაციო ტექნოლოგიების მომსახურების ექსპორტის მზარდი ტენდენცია დიდწილად, მიგრანტებისათვის ეტაპობრივად რეზიდენტობის სტატუსის მინიჭების შედეგია.

„მეტი სიცხადისათვის - მას შემდეგ რაც მიგრანტს რეზიდენტის სტატუსი ენიჭება, აღრიცხვის კუთხით, მისი საერთაშორისო შემოსავალი ტურიზმიდან, მომსახურების ექსპორტის სხვა კატეგორიაში ინაცვლებს. თავისთავად, მიგრაციის ნაკადის მდგრადობა საყურადღებო გამოწვევაა. თუმცა, ახლო მომავალში, მათი მასშტაბური გადინება ნაკლებ სავარაუდოა. აქვე მინდა გითხრათ, რომ ტენდენცია მზარდი იქნება როგორც ამ სერვისების ექსპორტის, ისე დარგიდან მიღებული შემოსავლების. ძალიან მატერიალურ ინდუსტრიად ყალიბდება ეს ინდუსტრია და მას ძალიან დიდი ზრდის პოტენციალი აქვს“, - აღნიშნა ოთარ ნადარაიამ.

მისივე თქმით, IT მომსახურების ექსპორტის ზრდის აღნიშნული დინამიკა შესაბამისობაშია TBC Capital-ის მიერ 2022 წლის დეკემბერში ჩატარებულ მიგრანტების გამოკითხვის შედეგებთანაც, სადაც გამოიკვეთა, რომ დასაქმების ნაწილში ყველაზე მსხვილი ინდუსტრია სწორედ საინფორმაციო ტექნოლოგიები იყო.

ცნობისთვის, საქსტატის ანგარიშის მიხედვით, მკვეთრად გაზრდილია ინფორმაციისა და კომუნიკაციების სფეროში დასაქმებულთა რაოდენობა. თუკი, 2021 წელს დარგში 30 ათასი ადამიანი იყო დასაქმებული, 2022 წლის ბოლოს დასაქმებულთა რაოდენობა უკვე 41 ათასს აღემატებოდა. ეს სამუშაო ძალის 38%-იანი მატებაა. დასაქმებულთა რაოდენობის ზრდა შეინიშნება მიმდინარე წელსაც.