ფინანსური ტექნოლოგიები განათლების სისტემაში - Edupay საერთაშორისო ბაზარზე გასვლას გეგმავს

ფინანსური ტექნოლოგიები ქართულ განათლების სისტემაში - საქართველოს სტარტაპ-ეკოსისტემის საკმაოდ ახალი წევრი „ედუფეი“ უცხოეთის ბაზარზე გასვლასა და ადგილობრივ ბაზარზე გაფართოებაზე მუშაობს. სტარტაპს, რომელმაც საგანმანათლებლო სფეროში გადახდების პროცესის გამარტივება განიზრახა, ამ ეტაპზე, საქართველოში ათობით დამკვეთი ჰყავს და მან 4 მილიონ დოლარზე მეტის გადასახადები უკვე დააიდენტიფიცირა. აღსანიშნავია, რომ „ედუფეი“ სწავლისთვის გადახდის პროცესის გამარტივებას ცდილობს მოსწავლისთვის, ხოლო სასწავლებლისთვის – გადასახადის ადმინისტრირების. თუ ადრე სასწავლებლების თანამშრომლებს მომხმარებლებისთვის სწავლის გადასახადის შეხსენება სატელეფონო ზარით უწევდათ, „ედუფეის“ პლატფორმა ამას ავტომატურად, SMS- და EMAIL-შეტყობინებების გაგზავნით ახერხებს. გარდა ამისა, „ედუფეი“ მშობელსა და სტუდენტს სასწავლებლის სახელით მიმართავს და ატყობინებს გადახდის თარიღს, თანხის ოდენობასა და ავტომატურად უგენერირებს ინვოისს, რომელიც ბმულის სახით მიჰყვება შეტყობინებას.

როგორც „ედუფეის“ თანადამფუძნებელი გიორგი ხაჩიძე ამბობს, საქართველო მათთვის საპილოტე ბაზარია. „კარგი შემოსავლის მიღება აქაც შეიძლება, რადგან კონკურენტი არ გვყავს. თუმცა, ჩვენ უფრო დიდ პოტენციალს გლობალურად ვხედავთ“, - აღნიშნავს ხაჩიძე და დასძენს, რომ ამ ეტაპზე, მოლაპარაკებებს ნიუ-იორკის 2 აკადემიასთან აწარმოებენ, ერთ-ერთი ბალეტის სკოლაა. აქ „ედუფეის“პლატფორმის ტესტირება მიმდინარეობს და ამ ბაზარზე გასვლა დამოკიდებული იქნება ტესტირების შედეგებზე.

ცნობისთვის, 2021 წელს, ბაზარზე გამოჩენიდან მოკლე დროში, „ედუფეიმ“ საქართველოს კერძო სკოლებში, უნივერსიტეტებსა და სხვა ტიპის სასწავლო დაწესებულებებში ფინტექმიმართულების აქტიურად დანერგვა დაიწყო.