რა ინფრასტრუქტურული პროექტების განხორციელება იგეგმება ძველ თბილისში
დედაქალაქის მერია ძველ თბილისში ინფრასტრუქტურული პროექტების განხორციელების გაგრძელებას გეგმავს.
თბილისის მერის კახა კალაძის განცხადებით, გორგასლის ქუჩაზე მოეწყობა ბულვარი, განხორციელდება ნარიყალას ციხის და ბარათაშვილის გალავნის რეაბილიტაცია.
"რა თქმა უნდა, ძველი თბილისი ქალაქის სავიზიტო ბარათია და ამ კუთხით, მასშტაბური პროექტების განხორციელებას ვაპირებთ. გეგმაშია გორგასალის ქუჩაზე ავტომაგისტრალის მიწის ქვეშ განთავსება და ბულვარის 9ჰა ტერიტორიაზე გაშენება. ასევე, რეაბილიტაცია ჩაუტარდება ნარიყალას ციხეს, ბარათაშვილის გალავანს, სულხან-საბასა და ინგოროყვას ქუჩებს; ჩუღურეთში, განახლდება აღმაშენებლის გამზირის მიმდებარე ბაღები. ეს გაზრდის თბილისის ტურისტულ პოტენციალს, გააძვირებს მოქალაქეების კუთვნილ ქონებას, გაზრდის მათ შემოსავლებს და ამავდროულად, ძველ თბილისში გააუმჯობესებს ეკოლოგიურ მდგომარეობას", - განაცხადა კახა კალაძემ.
ამასთან, მისივე თქმით, სიმდიდრე, რომელიც დედაქალაქს კულტურული მემკვიდრეობის ძეგლების სახით გააჩნია, სრულად მოწესრიგებული და რეაბილიტირებული იქნება.
„მეამაყება, რომ ჩვენ ვართ ის ადამიანები, ვინც შეძლო ორბელიანის მოედნის განახლება-რეაბილიტაცია თავისი მიმდებარე ქუჩებით; გუდიაშვილის მოედანი, რომელიც დარწმუნებული ვარ, იქნება ერთ-ერთი სავიზიტო ბარათი და მიზიდულობის ცენტრი ჩვენი ქალაქისთვის. ჩვენ ამაზე გაჩერებას არ ვაპირებ და გვინდა, რომ ეს სიმდიდრე, რომელიც თბილისს კულტურული მემკვიდრეობის ძეგლების სახით გააჩნია, იყოს რეაბილიტირებული, მოწესრიგებული და ასე გადავცეთ ჩვენს შვილებს, მომავალ თაობას“, - აღნიშნა თბილისის მერმა.
