მინისტრი: ქართული კინოინდუსტრიის განვითარებისთვის 40 მლნ დაიხარჯება
კულტურის, სპორტისა და ახალგაზრდობის მინისტრმა, თეა წულუკიანმა 10 წლიანი გეგმის წარდგენისას აღნიშნა, რომ ამ დროის განმავლობაში განხორციელდება უმაღლესი სახელოვნებო განათლების რეფორმა; ბიუჯეტი გაეზრდება უნივერსიტეტებს, კონსერვატორიას, სამხატვრო აკადემიას, თეატრალურ უნივერსიტეტს და ა.შ.
“არის პროფესიები, რომლებიც უნივერსიტეტში აღარ ისწავლება. პროფესიულ განათლებას სჭირდება ხელშეწყობა. გვინდა, რომ კულტურს სფეროში 30-მდე გამქრალი პროფესია აღდგეს. ასევე, ყურადღება მიექცევა სამეცნიერო საქმიანობას, რომელიც წინა ხელისუფლების დროს პრაქტიკულად ამოიძირკვა. ვვარაუდობთ, რომ 10 წლის თავზე ნაბიჯ-ნაბიჯ აღვადგენთ იმას, რაც წინა მთავრობის დროს იქნა დაკნინებული. ეს შეეხება, ლიტერატურას, საგამომცემლო საქმიანობას, თეატრს, მუსიკას ასევე სახვით ხელოვნებას და სალოტბარო სკოლების შექმნას, რო გავაგრძელოთ ის დიდი გზა, რასაც ანზორ ერქომაიშვილმა ჩაუყარა საფუძველი," – აცხადებს წულუკიანი.
მისივე თქმით, ქართულ კინოს აქვს ეკონომიკაში დიდი წვლილის შეტანის შესაძლებლობა, რომელიც დღეს შეიძლება ითქვას არ არის გამოყენებული.
"ჩვენ არამხოლოდ ქართული კინომემკვიდრეობის დაცვაზე უნდა ვიფიქროთ, არამედ კინოინდუსტრიის განვითარებაზე და ვფიქრობთ განვახორციელოთ ერთ-ერთი ყველაზე დიდი 40 მლნ-იანი ინვესტიცია განვახორციელოთ,“ – აღნიშნავს კულტურის მინისტრი.
