კახა კალაძე: მაჭავარიანის ქუჩაზე მოძრაობა აგვისტოს ბოლოს სრულად აღდგება
თბილისის მერის კახა კალაძის ინფორმაციით, ვაშლიჯვარში მეწყერსაწინააღმდეგო სამუშაოების ბოლო ეტაპია. სამუშაოები აგვისტოს ბოლოს დასრულდება და მაჭავარიანის ქუჩაზე მოძრაობა სრულად აღდგება.
“სპეციალური სისტემების საშუალებით დღემდე, 24 საათიანი მონიტორინგისა და ეფექტური საპრევენციო სამუშაოების შედეგად მიღწეულია მეწყრის დროებითი სტაბილურობა, ვაშლიჯვრის-ლისის დამაკავშირებელ საავტომობილო გზაზე მეწყერსაწინააღმდეგო პროექტის ფარგლებში ფერდის გამაგრება, ე.წ. ანკერების, მიწის მოჭრისა და სხვადასხვა ტიპის სამუშაოები ხორციელდება. აღნიშნული სამუშაოები მიმდინარე წლის აგვისტოს ბოლოს მთლიანად დასრულდება, რის შედეგადაც შესაძლებელი იქნება მაჭავარიანის ქუჩის საავტომობილო გზის აღდგენა უკვე ორმხრივ რეჟიმში, ყოველგვარი პრობლემების გარეშე და მაქსიმალური უსაფრთხოების დაცვით ადამიანებს თავისუფლად ექნებათ გადაადგილების შესაძლებლობა“,- განაცხადა კახა კალაძემ თბილისის მთავრობის სხდომაზე.
