კანადაში პორტების თანამშრომლები გაიფიცნენ

კანადის დასავლეთ პროვინციაში, ბრიტანეთის კოლუმბიაში, პორტების რამდენიმე ათასი თანამშრომელი გაიფიცა. ინდუსტრიის მასშტაბით, მათ ვერ მიაღწიეს შეთანხმებას კონტრაქტების განახლებაზე, რომელსაც ვადა მარტში ამოეწურა.

„ბრიტანეთის კოლუმბიის საზღვაო დამსაქმებელთა ასოციაციამ“ (BCMEA) განაცხადა, რომ ისინი შეხვდნენ გაფიცულ„საერთაშორისო ლონგშორისა და საწყობების კავშირის“ (ILWU Canada) წარმომადგენლებს მოსალაპარაკებლად, თუმცა, სავარაუდო შეთანხმების მიღწევა ვერ მოხერხდა.

დავა კოლექტიური მოლაპარაკების ხელშეკრულებაზე მოიცავს დაახლოებით 7,500 თანამშრომელს პროვინციის 30 ტერმინალში.

გაფიცულები მოლაპარაკებებს დღეს განაახლებენ, რათა შეთანხმებას მიაღწიონ და ბოლო სამი ათწლეულის განმავლობაში თავიანთი პირველი გაფიცვა დაასრულონ.

გაფიცვა საფრთხეს უქმნის და აფერხებს ოპერირებას კანადის ორ ყველაზე დატვირთულ - ვანკუვერისა და პრინს რუპერტის პორტებში, რომლებიც ბრუნვის მიხედვით ქვეყნის ნომერ 1 და მე-3 პორტებია. ისინი ქვეყნის ბუნებრივი რესურსების, საქონლის ექსპორტისა და ნედლეულის შემოტანის მთავარი კარიბჭეა.

ამ პორტებში ყოველდღე 604 მილიონი აშშ დოლარის ღირებულების საქონელი გადის, რაც კანადის მთლიანი სავაჭრო ნაკადის დაახლოებით მეოთხედს შეადგენს.

ანალიტიკოსების შეფასებით, გამოსვლას შეიძლება სერიოზული შედეგები მოჰყვეს კანადის ეკონომიკისა და მცირე ბიზნესისთვის.