EBRD რუსეთისთვის ფინანსებზე წვდომის უვადოდ შეჩერების საკითხს განიხილავს
რეკონსტრუქციისა და განვითარების ევროპული ბანკი (EBRD) უკრაინაში შეჭრის გამო, რუსეთისთვის საპასუხო გადაწყვეტილების მიღებას გეგმავს.
EBRD განცხადებას ავრცელებს, სადაც ნათქვამია, რომ საფინანსო ინსტიტუტის დირექტორთა საბჭო რუსეთის უკრაინაში შეჭრის გამო ქმედებების განხორციელებასთან დაკავშირებით, მენეჯმენტის წინადადებას დათანხმდა. მმართველი გუნდი გეგმავს ფინანსებსა და ბანკის სპეციალისტების მომსახურებაზე წვდომა უვადოდ შეუზღუდოს როგორც რუსეთს ასევე ბელორუსს.
EBRD-ის წესდების მიხედვით, მმართველ გუნდს რეზოლუციისთვის კენჭის ყრისთვის 30 დღე ექნება, რეზოლუციის მისაღებად საჭიროა მმართველი გუნდის არანაკლებ ორი მესამედის თანხმობა.
EBRD ასევე იკვლევს, პარტნიორებთან თანამშრომლობით, რეგიონისთვის გადაუდებელი დაფინანსების პაკეტის საკითხს, რომელიც შეიძლება მოიცავდეს მხარდაჭერას კერძო და საჯარო სექტორისთვის, ასევე ლტოლვილთა ნაკადით დაზარალებული მუნიციპალიტეტებისთვის.
