აშშ და ჩინეთი ექსპორტის კონტროლის საინფორმაციო დიალოგზე შეთანხმდნენ
შეერთებული შტატები და ჩინეთი ექსპორტის კონტროლის აღსრულების საინფორმაციო დიალოგის დაწყებაზე შეთანხმდენენ. შეიქმნება ახალი ფორმალური სამუშაო ჯგუფი, რომელიც კომერციულ საკითხებზე იქნება ორიენტირებული.
ამის შესახებ აშშ-ს ვაჭრობის დეპარტამენტმა ვაჭრობის მდივან ჯინა რაიმონდოსა და ჩინეთის კომერციის მინისტრ ვანგ ვენტაოს შორის შეხვედრების შემდეგ განაცხადა.
მისი თქმით, შეიქმნება პლატფორმა აშშ-ს ეროვნული უსაფრთხოების „პოლიტიკის გაუგებრობის შესამცირებლად“.
„ჩვენ არ მივდივართ კომპრომისზე და არ ვაწარმოებთ მოლაპარაკებებს ეროვნული უსაფრთხოების საკითხებზე” - განაცხადა ჯინა რაიმონდომ.
ჩინეთმა გააკრიტიკა აშშ-ს ძალისხმევა ექსპორტის კონტროლის გზით დაბლოკოს ჩინეთის ხელმისაწვდომობა მოწინავე ნახევარგამტარებზე, თუმცა, როგორც აშშ-ის ვაჭრობის დეპარტამენტში აცხადებენ, ეს საკითხი არ არის განკუთვნილი ღია დებატებისთვის.
„ჩვენ შევთანხმდით კომერციული საკითხებზე ახალი სამუშაო ჯგუფის შექმნაზე. ფორმალურ სამუშაო ჯგუფში ჩაერთვებიან აშშ-ისა და ჩინეთის მთავრობის წარმომადგენლები და, რაც მთავარია, აშშ-ისა და ჩინეთის კომერციული კერძო სექტორის წარმომადგენლები. ჩვენ ვეძებთ გზებს ვაჭრობისა და ინვესტიციების საკითხებზე შესათანხმებლად და ჩინეთში აშშ-ის კომერციული ინტერესების წინსვლისთვის.
შეერთებული შტატები მზად არის იყოს გამჭვირვალე ექსპორტის კონტროლის აღსრულების სტრატეგიის მიმართ. ჩვენ არ ვაპირებთ კომპრომისებს და არ ვაწარმოებთ მოლაპარაკებებს ეროვნული უსაფრთხოების საკითხებზე, მაგრამ ეს არის დიალოგი, სადაც გავზრდით გამჭვირვალობას იმის შესახებ, თუ რას ვაკეთებთ ექსპორტის კონტროლის აღსრულებაში“ - განაცხადა ჯინა რაიმონდომ.
