რა ბედი ეწევა იმ კლინიკების პაციენტებს, რომლებმაც რეანიმაციის სტანდარტი ვერ დააკმაყოფილეს
იმ კლინიკებს, რომლებმაც რეგულირების სააგენტოს 2023 წლის 1 სექტემბრამდე მიმართეს, თუმცა ვერ დააკმაყოფილეს სტაციონარული დაწესებულების სანებართვო პირობები, მიეცემათ უფლება, დაამთავრონ შემოწმების მომენტისთვის დაწყებული კლინიკური შემთხვევები.
აღნიშნულს ითვალისწინებს მთავრობის დადგენილება, რომელიც საკანონმდებლო მაცნეზე უკვე გამოქვეყნდა.
„რეანიმაციული და ქირურგიული მომსახურების მიმწოდებელ დაწესებულებებს, რომლებმაც… ახალი ნებართვის დანართის მოპოვების მიზნით, 2023 წლის 1 სექტემბრამდე მიმართეს სსიპ − სამედიცინო და ფარმაცევტული საქმიანობის რეგულირების სააგენტოს და ვერ მოიპოვეს ახალი ნებართვის დანართი, აქვთ შემოწმების მომენტისთვის დაწყებული კლინიკური შემთხვევების დასრულების უფლება.“ - ვკითხულობთ დადგენილებაში, რომლითაც კანონში შესაბამისი ცვლილებები შევიდა.
ცნობისთვის: რეანიმაციული სერვისის ყველა მიმწოდებელი ვალდებული იყო, ჯანდაცვის სამინისტროს მიერ წარმოდგენილი რეანიმაციული მომსახურების სანებართვო პირობები, 2023 წლის 1 სექტემბრამდე დაეკმაყოფილებინა.
სტანდარტი აწესებს შესაბამის პირობებს რეანიმაციული განყოფილების ინფრასტრუქტურული მოწყობის, აღჭურვილობის, ლაბორატორიული და დიაგნოსტიკური კვლევების, სპეციალური ოპერატიული პროცედურების, მომსახურების ხარისხის, სამედიცინო პერსონალის რაოდენობისა და განათლების ვალდებულების კუთხით. სანებართვო პირობების გარეშე, კლინიკას რეანიმაციული მომსახურების მიწოდების უფლება არ აქვს.
რამდენმა კლინიკამ ვერ დააკმაყოფილა აღნიშნული პირობები - ჯანდაცვის სამინისტრო ამის შესახებ ინფორმაციას არ ავრცელებს.
