"უნდა შევქმნათ ფინანსური პლატფორმა, რომელიც ხელს შეუწყობს გადამმუშავებელი საწარმოების წახალისებას ცირკულარული ეკონომიკის მიმართულებით"
მეწარმეებისთვის ცირკულარული ეკონომიკის პრინციპებისა და პერსპექტივების გაცნობის მიზნით, სემინარი „ცირკულარული ეკონომიკა საქართველოში” გაიმართა.
სემინარს გარემოს დაცვისა და სოფლის მეურნეობის მინისტრის მოადგილე სოლომონ პავლიაშვილი დაესწრო.
„ჩვენ უნდა შევქმნათ ფინანსური პლატფორმა, რომელიც ხელს შეუწყობს გადამმუშავებელი საწარმოების წახალისებას ცირკულარული ეკონომიკის მიმართულებით, რათა ეფექტიანად ამუშავდეს მწარმოებლის გაფართოებული ვალდებულება. როცა ვსაუბრობთ ცირკულარულ ეკონომიკაზე გადასვლაზე, ამას სჭირდება მხარდაჭერა, შესაბამისი ფინანსური პლატფორმა, რაც ყველაზე მნიშვნელოვანია“, - განაცხადა სოლომონ პავლიაშვილმა.
ცირკულარული ეკონომიკის საერთაშორისო ექსპერტმა, მდგრადი საკონსულტაციო სერვისების დირექტორმა დარიუშ პრასეკმა დამსწრე საზოგადოებას ცირკულარული ეკონომიკის ძირითადი პრინციპები, შესაძლებლობები, საერთაშორისო გამოცდილება და პრაქტიკა გააცნო.
დარიუშ პრასეკის განცხადებით, მცირე და საშუალო ბიზნესს შეუძლია გადამწყვეტი როლი შეასრულოს საქართველოს ცირკულარული ეკონომიკის პრინციპების დანერგვაში.
საქართველოში ევროკავშირის წარმომადგენლობის ატაშემ, ლიზე ვანვეიმელბეკემ, სიტყვით გამოსვლისას, საქართველოში ცირკულარული ეკონომიკის მიმართულებით პროგრესში გარემოს დაცვისა და სოფლის მეურნეობის სამინისტროს მიერ შეტანილი წვლილის შესახებ ისაუბრა.
„საქართველოში ცირკულარული ეკონომიკის მიმართულებით ნამდვილად არის პროგრესი. უკვე შეფასდა ცირკულარობა, რაც უმნიშვნელოვანესია მაკროეკონომიკის დონეზე. გამოიკვეთა დარგები, სადაც ცირკულარობის მაღალი ხარისხი, ანუ ნარჩენგადამუშავების მეტი პოტენციალია. გარემოს დაცვისა და სოფლის მეურნეობის სამინისტრო ყველაფერს აკეთებს, რომ საქართველო ამ მიმართულებით კიდევ უფრო დაუახლოვდეს ევროსტანდარტებს. ასევე აუცილებელია გადამმუშავებელი საწარმოების მხარდაჭერა, რათა მოხდეს ნარჩენების ხელმეორედ გამოყენება, რეციკრირება. სწორედ ამისთვისაა საჭირო ახალი პლატფორმა. მოვუწოდებ ფინანსურ ინსტიტუტებს, მხარი დაუჭირონ ამ პროცესს”, - ლიზე ვანვეიმელბეკემ.
სემინარი „ცირკულარული ეკონომიკა საქართველოში”, ევროპის რეკონსტრუქციისა და განვითარების ბანკის ორგანიზებით და ევროკავშირის მხარდაჭერით ჩატარდა.
