კონკურენციის სააგენტომ ბანკებში სადაზღვევო პროდუქტების რეალიზების მონიტორინგი დაიწყო
კონკურენციის სააგენტომ ბანკებში საკრედიტო ურთიერთობების დროს, სადაზღვევო პროდუქტების შეთავაზება-რეალიზების ბაზრის მონიტორინგი დაიწყო.
კონკურენციის სააგენტოს ცნობით, მიზანი ბაზარზე არსებული ვითარების და კონკურენტული გარემოს შესწავლაა. მონიტორინგი - “დაზღვევის კავშირის” მომართვის და სებ-ის 2022 წლის ფინანსური სტაბილურობის ანგარიშში წარმოდგენილი ინფორმაციის საფუძველზე დაიწყო. დოკუმენტში აღნიშნულია, რომ ფინანსური ორგანიზაციების (ბანკების) მიერ სადაზღვევო ბაზარზე კონკურენციის შესაძლო შეზღუდვა კვლავ გამოწვევად რჩება.
მონიტორინგი სებ-თან და დაზღვევის ზედამხედველობის სამსახურთან ერთად აქტიური კოორდინაციის ფორმატში განხორციელდება.
ამ დროისთვის, საქართველოს ბაზარზე 15 ლიცენზირებული კომერციული ბანკი და 18 ლიცენზირებული სადაზღვევო კომპანია ოპერირებს.
2022 წელს, კონკურენციის ეროვნულმა სააგენტომ ფარმაცევტული ბაზრის და საავტომობილო საწვავის (ბენზინი, დიზელი) მონიტორინგები დაასრულა. ფარმაცევტული ბაზრის შესწავლის ფარგლებში, 13 რეკომენდაცია გაიცა. საავტომობილო ბაზარზე, ვითარების გარკვევის მიზნით, მოკვლევის პროცესი დაწყებულია.
ამ ეტაპზე, მიმდინარე რეჟიმშია შუშის ნარჩენების და გაზის საავტომობილო საწვავის (CNG/LPG) ბაზრების მონიტორინგები.
