"ფინკა ბანკს" საქმიანობის ლიცენზია გაუუქმდა
"ფინკა ბანკი საქართველოს" საბანკო საქმიანობის ლიცენზია გაუუქმდა. შესაბამისი განკარგულება ეროვნული ბანკის პრეზიდენტმა გამოსცა.
განკარგულების თანახმად, იხურება "ფინკა ბანკის" საკორესპოდენტო ანგარიშები უცხოურ ვალუტაში, საქართველოს ეროვნულ ბანკში გახსნილი უცხოური ვალუტის მინიმალური რეზერვის, ყველა ვალუტის საკასო და სადეპოზიტო ანგარიშები.
"ფინკა ბანკის" აღნიშნულ ანგარიშებზე რიცხული თანხები ჩაირიცხება "კრედო ბანკის" შესაბამისი დანიშნულების ანგარიშებზე. ხოლო, მინიმალური რეზერვის, სადეპოზიტო და საკორესპოდენტო ანგარიშებზე დარიცხული პროცენტები აისახება "კრედო ბანკის" საკორესპოდენტო ანგარიშებზე.
უქმდება "ფინკა ბანკის" მონაწილეობა საქართველოს ფასიანი ქაღალდების ანგარიშსწორების სისტემაში (GSSS). "ფინკა ბანკის" მფლობელობაში არსებული ფასიანი ქაღალდები გადავა "კრედო ბანკის" მფლობელობაში.
"კრედო ბანკზე", როგორც "ფინკა ბანკის" სამართალმემკვიდრე პირზე, უცვლელად გადავა საქართველოს ეროვნული ბანკის მიმართ არსებული სასესხო ვალდებულებები.
"ფინკა ბანკმა" სალიცენზიო მოწმობა (არსებობის შემთხვევაში) საქართველოს ეროვნულ ბანკს უნდა დაუბრუნოს ლიზენციის გაუქმების შესახებ გადაწყვეტილების ძალაში შესვლიდან 3 დღის განმავლობაში.
"კრედო ბანკმა" FINCA Microfinance Cooperatief U.A. -თან აქციათა ნასყიდობის ხელშეკრულებას მოაწერა ხელი, რითაც იგი "ფინკა ბანკი" საქართველოს აქციების 100% წილის მფლობელი გახდა.
