EBRD საქართველოსთვის ახალ სტრატეგიას ამზადებს

ევროპის რეკონსტრუქციისა და განვითარების ბანკი (EBRD) საქართველოსთვის ახალ სტრატეგიას ამზადებს.

როგორც „ბიზნესპარტნიორს“ EBRD-ის რეგიონულმა დირექტორმა სამხრეთ კავკასიაში კატარინა ბიორლინ ჰანსენმა განუცხადა, მომავალი სტრატეგია 5 წლიანია. ის ფოკუსირებული იქნება მწვანე ეკონომიკის განვითარებაზე, ინკლუზიურ ეკონომიკურ ზრდასა და გაციფრულებაზე.

EBRD-ის რეგიონული დირეტორის განცხადებით, სტრატეგია ჯერ დეტალიზებული არ არის. ორგანიზაცია მას მიმდინარე წლის სექტემბერ-ოქტომბერში გამოაქვეყნებს.

როგორც ორგანიზაციაში აცხადებენ, EBRD-ის ამ დროისთვის 4 მლრდ ევროზე მეტი აქვს საქართველოში ინვესტირებული. დასრულებული აქვს 200 პროექტზე მეტი, ამ დროისთვის კი 90 პროექტზე მუშაობს.

„პროექტების მთლიანი მოცულობიდან, რაც შესრულებული გვაქვს, 80%-ზე მეტი კერძო სექტორს ეხება. ასევე ჩვენ ვფარავთ ეკონომიკის ოთხ ძირითად სექტორს: ენერგეტიკა, ინფრასტრუქტურა, საფინანსო ინსტიტუტები - კომერციული ბანკები და კერძო მეწარმეები. ჩვენი პორტფელი ძალიან დაბალანსებულია ამ ოთხ არეალს შორის და პროექტები დივერისიფიცირებულია მთლიან ეკონომიკაში,“ - აცხადებს კატარინა ბიორლინ ჰანსენი.