დაასუსტებს თუ გააძლიერებს სებ-ს პირველი ვიცე-პრეზიდენტი
საკადრო ცვლილებით სებ-ის დამოუკიდებლობის დაკარგვაზე უმცირესობის შიშებს, უმრავლესობა უსაფუძვლოდ მიიჩნევს.
ქვეყნის პრეზიდენტის მოტივირებული შენიშვნების საპარლამენტო განხილვაზე, დეპუტატმა ალუდა ღუდუშაურმა განაცხადა, რომ პირიქით, ცვლილებებით, სებ-ი ინსტიტუციურად გაძლიერდება.
პრეზიდენტის საპარლამენტო მდივანს, სებ-ის დამოუკიდებლობის შეზღუდვით მოსალოდნელ რისკებზე არგუმენტების მოხმობა გაუჭირდა.
მსხილაძემ დეპუტატებთან დაადასტურა მმართველი პარტიის მხრიდან ქვეყნის პრეზიდენტზე წნეხი, თუმცა დეტალებზე არ ისაუბრა. თქვა რომ. ზურაბიშვილი თავად ისაუბრებს, როგორ დაუბლოკეს სებ-ის საბჭოს წევრობის კანდიდატები და როგორ აიძულებენ ლაშა ხუციშვილის კანდიდატურის მოწონებას.
პარლამენტის ეკონომისტი წევრი რომან გოცირიძე (სებ-ის ყოფილი პრეზიდენტი) შიშობს, რომ ცვლილებები დროის წელიწადნახევრით გაჭიანურებას ემსახურება, ზურაბიშვილის უფლებამოსილების ვადის ამოწურვამდე, რომ სებ-ის პრეზიდენტის მოვალეობა სახელისუფლო კანდიდატმა შეასრულოს, რომელიც იქნება პირველი ვიცე-პრეზიდენტი, რომლის დეფინიციაც შემოაქვს საკანონმდებლო ცვლილებებს.
დეპუტატების ნაწილმა ცვლილებების მიზანშეუწონლობაზე მოიხმო საერთაშორისო საფინანსო ინსტიტუტების ნეგატიური შეფასება, მათ შორის სსფ-ს.
IMF-ის მისიის ხელმძღვანელის ჯეიმს ჯონის თქმით, პარლამენტის გეგმა, დაძლიოს პრეზიდენტის ვეტო, მიუღებელია და იგი საფრთხეს უქმნის საქართველოს ეროვნული ბანკის დამოუკიდებლობას.
