2024 წლის 1-ელი იანვრიდან დეპოზიტების დაზღვევის ზღვარი ₾30 000-მდე იზრდება

2024 წლის პირველი იანვრიდან დეპოზიტების დაზღვევის ზღვარი 30 000 ლარამდე იზრდება.

როგორც დეპოზიტების დაზღვევის სააგენტოს ხელმძღვანელმა ლევან თოდუამ „ბიზნესპარტნიორთან“ განმარტა, ცვლილების შედეგად, საბანკო სექტორისთვის დეპოზიტების დაზღვევის სააგენტოში სავალდებულო სადაზღვევო შენატანი დაახლოებით 40%-ით გაიზრდება.

„სადაზღვევო ზღვრის გაორმაგება არ ნიშნავს, რომ ბანკების მხრიდან გადასახდელი ყოველთვიური თანხაც გაორმაგება.

ჩვენი გამოთვლებით და სიმულაციით, სავალდებულო შენატანი საშუალოდ 40%-ით გაიზრდება. ცვლილება, რომელიც იგეგმება შემდეგი წლიდან  გულისხმობს, რომ ფიზიკური და იურიდიული პირების დეპოზიტები 30 000 ლარამდე იქნება დაზღვეული. პირობითად, თუ ფიზიკურ ან იურიდიულ პირს ორ ბანკში აქვს 30 000 -30 000 ლარი, დაზღვეული იქნება ორივე დეპოზიტი,“-განმარტავს ლევან თოდუა.

დეპოზიტების დაზღვევის სისტემა საქართველოში 2018 წლის 1 იანვრიდან მოქმედებს. დეპოზიტების დაზღვევის ზღვართან დაკავშირებით ცვლილება ერთხელ უკვე განხორციელდა. შედეგად, 2020 წლის 1-ლი ივლისიდან დაზღვეული დეპოზიტების ზღვარი 15 000 ლარამდე გაიზარდა.

ამასთან, 2022 წლის პირველი იანვრიდან, დეპოზიტების დაზღვევის სისტემა იურიდიულ პირებზეც გავრცელდა. მანამდე კი მხოლოდ ფიზიკური პირების დეპოზიტები იყო დაზღვეული.