"აწარმოე საქართველოში" ელექტროენერგიის წარმოების დაფინანსების კომპონენტით დიდი დაინტერესებაა
„აწარმოე საქართველოში“ ელექტროენერგიის წარმოების დაფინანსების კომპონენტით დიდი დაინტერესებაა - ამის შესახებ სააგენტოს მცირე და საშუალო ბიზნესის განვითარების დეპარტამენტის უფროსი ლაშა ბოსტაშვილი აცხადებს.
მისი თქმით, ფიზიკური და იურიდიული პირები, რომლებიც განახლებადი ენერგიის მცირე პროექტების მშენებლობით არიან დაინტერესებული, თავდაპირველად კომერციულ ბანკს მიმართავენ, სესხის დამტკიცების შემდეგ კი, ინფორმაცია სააგენტოში იგზავნება.
"უკვე შემოსულია რამდენიმე აპლიკაცია დამტკიცებული სესხის შესახებ კომერციული ბანკებიდან და სააგენტო შვიდ კალენდარულ დღეში დაადასტურებს. ერთი შემთხვევა უკვე გაქვს, სადაც კონკრეტული ბენეფიტებით შევედით. ორი განაცხადი დამუშავების ეტაპზეა. სააგენტოს ყველა თანამშრომელს, რომელსაც შეხება აქვს ამ პროექტთან, ძალიან აქტიური კომუნიკაცია აქვს როგორც პოტენციურ მეწარმეებთან, ასევე კომერციულ ბანკებთან. პროცესში კომერციული ბანკი არის პირველი ეტაპი და სესხის დამტკიცების შესახებ ინფორმაცია იგზავნება ჩვენთან. ბუნებრივია, მოწმდება შესაბამისობა კრიტერიუმებთან და ჩვენ შვიდ დღეში ვადასტურებთ. ეს ყველაფერი კი მთლიანად გაციფრულებულია და ონლაინ სივრცეში ხდება“ - ამბობს ლაშა ბოსტაშვილი.
ელექტროენერგიის წარმოების დაფინანსების კომპონენტი „აწარმოე საქართველოში“ ბიზნეს უნივერსალის პროგრამას ერთი თვის წინ დაემატა. პროგრამის ფარგლებში, სააგენტო ახორციელებს სესხის პროცენტის სუბსიდირებას სესხის სრული ვადით - სებ-ის რეფინანსირების განაკვეთს გამოკლებული 5%-ის ოდენობით.
აღნიშნული ეკონომიკური საქმიანობის ფარგლებში სესხით/ლიზინგით სარგებლობისთვის სავალდებულოა, ობიექტი აწარმოებდეს მზის, ქარის ან ჰიდროენერგიას და მათი დადგმული სიმძლავრე 0.5 მეგავატს არ აღემატებოდეს.
