ოთარ ნადარაია ეროვნული ვალუტის კიდევ უფრო გაუფასურებას ელის

„თიბისი კაპიტალი“ ეროვნული ვალუტის კიდევ უფრო გაუფასურებას პროგნოზირებს. „თიბისი ბანკის“ მთავარი ეკონომისტი ვარაუდობს, რომ კურსი 3.7 ლარამდე დაეცემა.

„ეს გაუფასურება იმხელაა, რომ ეს მეტისმეტია, ასეთს არ ველოდით. სამწუხაროდ, ე.წ “ოვერშუთინგი” გვაქვს და თუ ჩარევა არ მოხდა ლარი კიდევ უფრო მეტად გაუფასურდება. მხოლოდ ამის შემდეგ დაიწყებს გამყარებას. დღეს რაც შემიძლია გითხრათ, ვფიქრობთ, რომ ამ პერიოდში იქნება მკვეთრი გაუფასურება და წლის ბოლოსკენ ის 3.3 ლარზე უნდა გამყარდეს. თუმცა, ესეც იმ დაშვებით, რომ შოკი ბოლომდე კურსზე არ გადაივლის. ველოდებით, რომ ბაზარზე დოლარის მიწოდება გაიზრდება“,- განმარტავს „ბიზნესპარტნიორთან“ ოთარ ნადარაია.

კითხვაზე, დაეცემა თუ არა კურსი 4 ლარამდე, ეკონომისტი პასუხობს:

„არ ვფიქრობთ, რომ 4-ს გადაცდება. დღევანდელი დონე ჩანს, რომ არის პიკური. შეიძლება ავიდეს 3.7-ზე, მაგრამ ველით, რომ მაგაზე რეაგირება იქნება

უკვე გაცხადდა, მთავრობა და ეროვნული ბანკი მნიშვნელოვან საგარეო დაფინანსებას მოიზიდავენ. ანუ, ბაზარზე დოლარი შემოვა. ასევე ბანკებიც ახდენენ ვალუტაში მოზიდვას. ვფიქრობთ, რომ ვალუტის მიწოდება ბაზარზე გაიზრდება და მხოლოდ კურსზე არ გადავა“,- აცხადებს ნადარაია.

თიბისი ბანკის მთავარი ეკონომისტი აქვე ეროვნულ ბანკს რეზერვების გაყიდვას ურჩევს.