ივნისში წლიური ინფლაცია 12.8% იყო

ინფლაცია სამიზნე მაჩვენებლისგან კვლავ მნიშვნელოვნად არის დაშორებული.

როგორც მოსალოდნელი იყო ივნისში ფასების ზრდის მაღალი ტემპი დაფიქსირდა და წლიური ინფლაციის დონე თითქმის 13%-ს აღწევს. ყველაზე მეტად 22%-ით ფასები სურსათსა და უალკოჰოლო სასმელებზე გაიზარდა, მათ შორის 35%-ით გაძვირდა პურ-პროდუქტები, ბოსტნეული 33%-ით, ხილი 32%-ით. მნიშვნელოვნად არის ასევე გაზრდილი სატრანსპორტო მომსახურება და კომუნალური გადასახადები.

წლიური ინფლაციის ფორმირებაზე ძირითადი გავლენა იქონია ფასების ცვლილებამ სურსათისა და უალკოჰოლო სასმელების, ტრანსპორტის და კომუნალური გადასახადების ჯგუფებმა. 

სურსათისა და უალკოჰოლო სასმელების ჯგუფში ფასები 21.8%-ით გაიზარდა, რაც წლიურ
ინფლაციაზე 6.86%-ით აისახა. ფასები მომატებულია პურსა და პურპროდუქტებზე 35%-ით, ბოსტნეულსა და ბაღჩეულზე 33.4%-ით, ხილსა და ყურძენზე 31.8%-ით, მინერალურ და წყაროს წყალზე, უალკოჰოლო სასმელებსა და ნატურალურ წვენებზე 24.0%-ით, რძეზე, ყველსა და კვერცხზე 19.5%-ით, ყავაზე, ჩაისა და კაკაოზე 18.0%-ით,  თევზეულზე 17.9%-ით, შაქარზე, ჯემსა და სხვა ტკბილეულზე 16.0%-ით, ზეთსა და ცხიმზე 14.9%-ით, ხორცსა და ხორცის პროდუქტებზე 11.3%-ით. 

ტრანსპორტის ჯგუფში ფასები გაიზარდა 19.4%-ით, რაც 2.34%-ით აისახა მთლიანი ინდექსის ზრდაზე. ფასები მომატებულია პირადი სატრანსპორტო საშუალებების ექსპლუატაციაზე 23.6%-ით, სატრანსპორტო მომსახურებაზე 14.1%-ით, და სატრანსპორტო საშუალებების შეძენაზე 6.2%-ით. 

კომუნალური გადასახადების მიმართულებით, ფასები 13%-ითაა გაზრდილი, რაც 1.31%-ით აისახა წლიურ ინფლაციაზე.