პრემიერი: აირზენას დირექტორი ელოდება, რაც უფრო მეტ ფულს გადაუხდიან
კომპანია „აირზენას“ დირექტორი ელოდება იმას, რომ რაც შეიძლება მეტ ფულს გადაუხდიან და სხვას არაფერს, – განაცხადა გიორგი გახარიამ ჟურნალისტებისთვის გამართულ ბრიფინგზე.
პრემიერმა აირზენას დირექტორს შეახსენა, რომ ქვეყანაში საგანგებო მდგომარეობაა და კომპანიებს საგანგებო მდგომარეობის შესაბამისად ვალდებულებების შეუსრულებლობის გამო სანქციები დაეკისრებათ.
„აირზენას“ დირექტორი ელოდება იმას, რაც უფრო მეტ ფულს გადაუხდიან – სხვას არაფერს. ჩვენი ამოცანა არის მაქსიმალურად სწრაფად, ორგანიზებულად, მოქალაქეები გამოვიყვანოთ მსოფლიოს სხვადასხვა ქალაქებიდან.
არავის დაავიწყდეს, რომ არის საგანგებო მდგომარეობა. თუ კომპანიები, საგანგებო მდგომარეობის გათვალისიწნებით არ შეასრულებენ მოქალაქეების ინტერესებიდან გამომდინარე სახელმწიფოს დაკისრებულ ვალდებულებებს, ამ კომპანიების ხელმძღვანელებს ჯერ დაეკისრებათ ჯარიმა, შემდეგ სისხლის სამართლებრივი პასუხისმგებლობა და კომპანიები იქნებიან ექსპროპრირებული სახელმწიფოს ინტერესებში, დროებით რომ სახელმწიფომ დაიცვას თავისი ინტერესები“, – განაცხადა გიორგი გახარიამ.
