ისრაელი-ჰამასის სამხედრო დაპირისპირების ფონზე, ახლო აღმოსავლეთში ოქრო გაძვირდა

ისრაელი-ჰამასის სამხედრო დაპირისპირების ფონზე, მსოფლიოს მასშტაბით ოქროს მიმართ მოთხოვნა იზრდება, შესაბამისად, მზარდია ფასებიც. ამასთან, გაზრდილია მოთხოვნა სახაზინო ობლიგაციებზე.

როგორც „ბიზნესპარტნიორს“  Galt & Taggart-ის უფროსმა ასოცირებულმა ბროკერმა რატი მესხიშვილმა  განუცხადა, თუ ომამდე 1  უნცია მეტალის ფასი  1820 დოლარი იყო, დღევანდელი მოცემულობით მისი ღირებულება 1,877 დოლარს შეადგენს.

„გარდა ამისა, გაზრდილია მოთხოვნა ობლიგაციებზეც, განსაკუთრებით კი ამერიკის შეერთებული შტატების ობლიგაციების მიმართ. მოთხოვნის ზრდა მარტივი მიზეზით არის განპირობებული.  ზოგადად, გეოპოლიტიკური რისკების ზრდის ფონზე, კრიზისისგან თავის დასაზღვევად, ინვესტორები დაბალრისკიან აქტივებს ირჩევენ. ოქრო კრიზისისგან ჰეჯირების ერთ-ერთ საუკეთესო საშუალებად მიიჩნევა.  ასევე, დაბალრისკიან აქტივად განიხილავენ ინვესტორები ამერიკის შეერთებული შტატების სახაზინო ობლიგაციებსაც, რადგან ამერიკის მთავრობას, ობლიგაციებზე დეფოლტი არასოდეს განუცდია“, - აღნიშნა რატი მესხიშვილმა.

რაც შეეხება მოლოდინებს ოქროს ფასებთან დაკავშირებით, Galt & Taggart-ის უფროსმა ასოცირებულმა ბროკერმა აღნიშნა, რომ ანალიტიკოსებს პროგნოზის გაკეთება უჭირთ.

„ყველაფერი დამოკიდებული იქნება იმაზე, თუ როგორ განვითარდება მოვლენები და რა ვადებში დასრულდება ომი ახლო აღმოსავლეთში“, - განმარტა მესიხშვილმა.

მისივე თქმით, დღევანდელი მოცემულობით, ძვირფასი მეტალის ღირებულება დროებით მაღალ ნიშნულზე შენარჩუნდება.