ირმა დაუშვილი: ახტალის ტალახების პროცედურების ჩატარება თბილისშიც იქნება შესაძლებელი

დავით ვაშაძის ფიტო-ბალნეოთერაპიის ცენტრის დამფუძნებელი ირმა დაუშვილი „ბიზნესპარტნიორთან“ აცხადებს, რომ  ცენტრი ახალი სერვისების დანერგავზე მუშაობს. ერთ-ერთი მიმართულება კი ახტალის ტალახების პროცედურები იქნება.

მისივე ინფორმაციით, ამჯერად  კომპანიის მენეჯმენტის სურვილია ცენტრში თავმოყრილი იყოს ყველა ის ბუნებრივი რესურსი, რაც საქართველოს ბალნეო-კურორტებზე არსებობს.

„ჩვენს ცენტრში უკვე ჩამოგვაქვს „ნუნისის წყალი“ და პაციენტებს ვთავაზობთ. მოგეხსენებათ, ნუნისში მკურნალობის ციკლი, დაახლოებით, 21 დღეს მოიცავს, ყველას არ აქვს არც დრო და არც შესაძლებლობა, რომ იქ იმკურნალოს. ამიტომ, ჩვენ აქ ვთავაზობთ აღნიშნული პროდუქტის მიღების და სერვისის შესაძლებლობას.  გვინდა, რომ ეს ცენტრი გახდეს ისეთი ადგილი, სადაც პაციენტები გაეცნობიან საქართველოში არსებული სხვადასხვა ბუნებრივი რესურსებით მკურნალობის საშუალებებს და მიმართულებებს“, - აცხადებს ირმა დაუშვილი.

მისივე ინფორმაციით, დავით ვაშაძის ფიტო-ბალნეოთერაპიის ცენტრის ცნობადობა როგორც ქვეყნის შიგნით, ისე მის ფარგლებს გარეთ მზარდია, გაზრდილია მომართვიანობა როგორც უკრაინიდან და რუსეთიდან, ისე ყაზახეთიდან.

ცნობისთვის, დავით ვაშაძის ფიტო-ბალნეოთერაპიის ცენტრი 1 წლის წინ გაიხსნა. კლინიკაში მკურნალობა ხდება მცენარეული ნაკრების ჩართულობით, რომელსაც ექიმი ფიტოთერაპევტი დავით ვაშაძე  30 წლიანი გამოცდილებით ამზადებს.

ცენტრში შესაძლებელია ისეთი სარებილიტაციო ბალნეო-პროცედურების ჩატარება, როგორებიცაა: ჰიდროკოლონოთერაპია, გოგირდის აბაზანები, სპა პროცედურები, ნუნისის წყლის აბაზანები (გამოიყენება კანის ქრონიკული დაავადებების სამკურნალოდ: აკნე, ფსორიაზი, ნეიროდერმიტი და ა.შ), ფიზიოთერაპია უახლესი აპარატურით და სხვა.