გრილი ბიზნესი - ნაყინზე მოთხოვნამ პანდემიამდელ მაჩვენებელს გადააჭარბა

რუსეთ-უკრაინის ომს და პანდემიას საქართველოში ნაყინის გაყიდვებზე გავლენა არ მოუხდენია, თუმცა პროდუქცია ორივე მოვლენამ გააძვირა. როგორც „ბიზნესპარტნიორს“ კომპანია „თოლიას“ მარკეტინგის მენეჯერმა, სანდრო ლომთაძემ განუცხადა, ნაყინის თვითღირებულება წელს, წინა წელთან შედარებით, 12%-ით გაიზარდა.

„რუსეთ-უკრაინის ომმა მსოფლიო ბაზარზე ნედლეულის გაძვირება გამოიწვია, რის შედეგადაც, სხვადასხვა ტიპის ნაყინი ქვეყანაში საშუალოდ 12%-ით გაძვირდა. რაც შეეხება გაყიდვებს, მიუხედავად გაზრდილი ფასებისა, დაახლოებით 15%-ით გაიზარდა გაყიდვები“,- აღნიშნა სანდრო ლომთაძემ.

მისივე განმარტებით, ნაყინის სექტორში ზრდა იყო 2020 და 2021 წლებშიც.

„პანდემიის გამო ნაყინის სექტორი წაგებაზე არ წასულა. ცხადია, რომ არა ეს მოვლენები,  გაყიდვების რიცხვი გაცილებით მაღალი იქნებოდა, თუმცა, 2020 წელსაც კი 2%-იანი ზრდა გვქონდა გაყიდვებში. ასე რომ, წელს ნაყინის გაყიდვებმა პანდემიმადელ მაჩვენებელსაც კი გადაასწრო“, - დასძინა „თოლიას“ მარკეტინგის მენეჯერმა.

აღსანიშნავია, რომ „თოლიას“ წარმოებას ზამთრის სეზონზეც აგრძელებს, თუმცა სეზონურობიდან გამომდინარე, წარმოებას მნიშვნელოვნად ამცირებს.