GDG ჯგუფი იმერეთში 2 სასტუმროს მმართველ კომპანიას წლის ბოლომდე შეირჩევს

GDG ჯგუფი ქუთაისის აეროპორტთან და ვანში 4-ვარსკვლავიან სასტუმროებს  მიმდინარე წლის ბოლოს ან  2024 წლის ზაფხულში გახსნის.

როგორც კომპანიის ხელმძღვანელი ბიძინა წაქაძე „ბიზნესპარტნიორთან“ აცხადებს, პროექტების გახსნა მიმდინარე წელს იყო დაანონსებული, თუმცა, გლობალური კოვიდ პანდემიის გამო, სამშენებლო სამუშაოები დაპაუზდა, ამან კი პროექტის გახსნის გადავადება გამოიწვია.

წაქაძე აცხადებს, რომ სამშენებლო სამუშოების ნაწილი თვის ბოლოს განახლდება. „აქამდე ქუთაისის პროექტზე ფასადის შეთანხმების ეტაპი იყო, სამუშაოები აქამდე იმიტომ არ განვაახლეთ,“-აღნიშნავს წაქაძე.

მისი ინფორმაციით, ვანის სასტუმროს მშენებლობა უკვე დასრულებულია, დარჩენილია სარემონტო სამუშოები. რაც შეეხება ქუთაისის სასტუმროს, ამ შემთხვევაშიც მშენებლობა დასრულებულია, 1 თვეში კი  ფასადის მოპირკეთების სამუშოები დაიწყება.

წაქაძის განცხადებით, ორივე სასტუმროს მართვაში შესვლით რამდენიმე საერთაშორისო ბრენდია დაინტერესებული. მათ შორისაა Mariott-ი, Best Western-ი და Colliers International-ი. თუმცა, მისივე ვარაუდით, ორივე სასტუმროში ოპერირება შესაძლოა Best Western-ის ბრენდმა დაიწყოს.

„საბოლოო გადაწყვეტილება ჯერ მიღებული არ გვაქვს, ამ წლის ბოლოსთვის აუცილებლად გვეცოდინება რომელი  ოპერატორი კომპანია შევა იმერეთის სასტუნროებში,“-აცხადებს წაქაძე.

ქუთაისის აეროპორთან მშენებარე სასტუმროს პროექტში დაახლოებით 8 მლნ დოლარის , ვანში კი  3-4 მლნ დოლარის ინვესტიცია ხორციელდება.

ქუთაისის აეროპორთან 120 ნომრიანი სასტუმრო 5 სართულიანი იქნება. 12 000 კვ.მ ფართობზე გაშენებულ კომპლექსში სასტუმროს გარდა, რესტორანი, ბარი და კაზინო განთავსდება.

რაც შეეხება ვანში ოთხვარსკვლავიან სასტუმროს, 45 ნომრიანი იქნება. მასში განთავსდება საკონფერენციო, სპორტული დარბაზი და რესტორანი.