შემოწმებული 1553 დასახელების სათამაშოდან ნახევარი ტექნიკურ მოთხოვნებს ვერ აკმაყოფილებს
ეკონომიკის სამინისტრო სათამაშოებზე ზედამხედველობის პროცედურებს აქტიურად აგრძელებს. რეგლამენტის ამოქმედებიდან დღემდე საბაჟოზე სულ შემოწმდა 1553 დასახელების სათამაშო, საიდანაც 49.5%-მა ვერ დააკმაყოფილა.
„2020 წლიდან ტექნიკური რეგლამენტის აღსრულებითი ნაწილის ძალაში შესვლამდე, 2021 წლის 1 ივლისამდე, განხორციელდა შემოწმებული სათამაშოების შესაბამისობაში მოსაყვანად გაიცა რეკომენდაციები.
ჯამში ადგილობრივ ბაზარზე 125 ეკონომიკური ოპერატორის მიერ ბაზარზე განთავსებული 394 ტიპის სათამაშო შემოწმდა, რაც მოიცავდა სათამაშოების როგორც დოკუმენტურ ისე ტექნიკურ მოთხოვნებთან შესაბამისობის შემოწმებას, ამასთანავე 22 სათამაშო გაგზავნილ იქნა საზღვარგარეთ აკრედიტირებულ ლაბორატორიაში ქიმიურ შემადგენლობაზე შემოწმების მიზნით, კერძოდ კი შემდეგ მძიმე ქიმიურ ელემენტებზე: ტყვია, ალუმინი, ნიკელი, დარიშხანი, ბორი, ბარიუმი, სტიბიუმი, კობალტი. საიდანაც ორ სათამაშოში, კერძოდ ტყლარწებში, აღმოჩნდა, რომ ბორის შემცველობა ბევრად აღემატებოდა დასაშვებ ლიმიტს, შესაბამისად ვერ დააკმაყოფილა სათამაშოების უსაფრთხოების შესახებ ტექნიკური რეგლამენტით განსაზღვრული მოთხოვნები.
მნიშვნელოვანია აღინიშნოს, რომ ტექნიკური რეგლამენტის აღსრულებითი ნაწილი ძალაში შევიდა 2021 წლის 1 ივლისს და ამ დროიდან უკვე სავალდებულო გახდა რეგლამენტით განსაზღვრული მოთხოვნების დაკმაყოფილება, თუმცა, ქვეყანაში შექმნილი ეპიდემიოლოგიური ვითარებისა და უწყებათაშორისი საბჭოს გადაწყვეტილების საფუძველზე გაცემული რეკომენდაციების გათვალისწინებით, ამ ეტაპზე, არ ხდება სათამაშოების უშუალოდ ბაზარზე, რეალიზაციის ადგილებში შემოწმება და მხოლოდ საბაჟოზე ხორციელდება იმპორტით შემოსული სათამაშოების დოკუმენტური ზედამხედველობა. ამ ფორმით სულ შემოწმდა 1553 დასახელების სათამაშო, საიდანაც 49.5%-მა ვერ დააკმაყოფილა ტექნიკური რეგლამენტით განსაზღვრული მოთხოვნები და, შესაბამისად, არ მოხდა მათი დაშვება საქართველოს ბაზარზე განსათავსებლად,“ - განმარტავს ეკონომიკის სამინისტროს ბაზარზე ზედამხედველობის სააგენტოს სამომხმარებლო პროდუქტებზე ზედამხედველობის დეპარტამენტის უფროსი ნიკო ფილფანი.
შეგახსენებთ, რომ სათამაშოებზე ზედამხედველობის პროცედურები 2020 წლის იანვრიდან დაიწყო.
